ਪੰਜਾਬ ਹੈ ਇੱਕ ਬੇਮਿਸਾਲ ਸੂਬਾ

************************


ਗੱਲਾਂ ਕਹਿਣ ਤੇ ਸੁਨਣ ਨੂੰ ਜੱਚਦੀਆਂ ਨੇ ,

ਖੁਸ਼ਹਾਲ ਹਾਂ, ਸਾਡਾ ਖੁਸ਼ਹਾਲ ਸੂਬਾ ।



ਪੂਰੀ ਦੁਨੀਆਂ ਵਿੱਚ , ਧਾਕ ਪੰਜਾਬੀਆਂ ਦੀ ,

ਪੰਜਾਬ ਹੈ ਇੱਕ , ਬੇਮਿਸਾਲ ਸੂਬਾ ।



ਬੇਰੁਜ਼ਗਾਰੀ , ਕਰਜ਼ਈ ਕਿਰਸਾਨੀਆਂ ਦਾ ,

ਖ਼ੁਦਕੁਸ਼ੀਆਂ ਲਈ , ਇਹ ਕਮਾਲ ਸੂਬਾ ।



ਨਸ਼ੇਖੋਰੀਆਂ, ਚੋਰੀਆਂ , ਡਾਕਿਆਂ ਲਈ ,

ਜ਼ੁਰਮਾਂ ਨਾਲ ਨਿਹਾਲੋ-ਨਿਹਾਲ ਸੂਬਾ ।



ਤੀਆਂ, ਤ੍ਰਿੰਜਣਾ ,ਕਿੱਕਲੀਆਂ ਨਾ ਮੇਲੇ ,

ਪਾਊਂਦੈ ਡੀ.ਜੇ.'ਤੇ ਪੱਬੀਂ ਧਮਾਲ ਸੂਬਾ ।



ਸਭਿਆਚਾਰ ਤੇ ਵਿਰਸੇ ਨੂੰ ਭੁੱਲ ਬੈਠਾ ,

ਵੇਚ ਵਿਰਾਸਤਾਂ ,ਪੇਟ ਰਿਹੈ ਪਾਲ ਸੂਬਾ ।





'ਸਪਤ ਸਿੰਧੂ' ਅਖ਼ਵਾਉਂਦਾ ਸੀ ਕਿਸੇ ਵੇਲੇ ,

ਦਿੱਲੀ ਤੱਕ ਸੀ, ਇਹ ਵਿਸ਼ਾਲ ਸੂਬਾ ।



ਦਮਗਜ਼ੇ ਲੱਖ ਮਾਰਦੇ ਫਿਰਨ ਨੇਤਾ ,

ਹੋ ਗਿਆ ਚਾਦਰੋਂ, ਸੁੰਗੜ ਰੁਮਾਲ ਸੂਬਾ ।





ਕਿੰਨਾ ਉਭਰਿਆ 'ਤੇ ਕਿੰਨਾ ਨਿਘਰਿਆ ਹੈ ,

ਸਭ ਜਾਣਦੇ ਸਾਲ ਦੇ ਸਾਲ ਸੂਬਾ ।



'ਘੁਮਾਣ' ਸੋਚ, ਵਿਚਾਰ,ਨਿਰਪੱਖ ਹੋ ਕੇ ,

ਤੇਰਾ ਹੋ ਗਿਆ ਸੱਚੀਂ ਕੰਗਾਲ ਸੂਬਾ ॥



ਲੇਖਕ : ਜਰਨੈਲ ਘੁਮਾਣ

Written By : Jarnail Ghuman

Phone no : +91-98885-05577

Email : ghuman5577@yahoo.com